الورقة دى بتقول لنا بالضبت:" شوف يا ولد انت و هو احنا اهو عملنا اللى علينا: كبرنا و علمنا 4 سنين و تعبنا فيكم تعب الدنيا علشان تطلعوا نجوم الاعلام الارضى و الفضائى و البحرى كمان. بس شوف اللى اوله شرط اخره اييييه؟ نور! التعليم حاجة و الشهاده الكبيرة حاجة ثانية... عايز بقى الشهادة الكبيرة تدفع 6 جنية و 10 قروش: أوكى؟؟
هو انت ما اخذتش بالك ايه اللى كان مكتوب فى العقد اللى مضيته؟: احنا متفقين على ان العرض سارى أربع سنوات دراسية قابلة للزيادة لو لا قدر الله شلت مادة و بيتضمن
محاضرات مكررة فى كل مادة عن العناصر الخمسة لوسائل الاتصال + عدد ساعات عملية تتدربو على كاميرات متلصمة بسوليتيب و ذلك على ايدى معيدين بيجربوا معاكم كيفية التعامل مع مثل هذه الاجهزة (ما اصلهم زيكم ما لحقوش يتعلموا حاجة فمعلش سيبوا لهم الفرصة بردو!) + 8 امتحانات نصف فصلية و كمان + 7 امتحانات نهائية... اييييييييييوة يا عم 7 بس!!؟
اصل الامتحان النهائى بتاع سنة رابعة بتعتبر" اوبشان" يعنى من الكماليات فما ينفعش نحطها ضمن المصاريف اللى بتدفعوها كل اول سنة... المصاريف دى علشان نخرج لكم المعدات الجديدة بتاعت الستوديو اللى وعدناكم بيها من سنة ثانية...فاكرين؟؟ ما اصلها موقوفة فى الجمارك بقالها اكثر من سنتين اهى... بس ان شاء الله ممكن يأتى لكم الفرصة ان تشوفوها فى يوم من الايام: بعد 20 سنة كدة لو جيتم الكلية و لا حاجة!! و بعدين ما تنسوش بردو ان المصاريف دى بنأخذها علشان نجيب الباتيه و العصير لضيوفنا الكرام اللى بيجوا يحاضروكم عن مستقبل مصر السياسى الباهر و الاعلام المصرى الحر فى عصر الفضائيات... ده احنا بنعمل شغل جامد!!"؟
فقلت لنفسى هى جت على دى يعنى: ما احنا دفعنا فى كتاب ما درسناش منها حاجة و دفعنا بردو فى كتاب كان المفروض ندرس منه للمادة كلها و اكتشفنا بعد كدة ان احنا أخذنا منها صفحتيت و ما كانش لها لازمة علشان هانشترى كتاب الدكتور الثانى اللى بيقول فيه نفس الكلام
مش عارفة ليه انا معقداها كده... المفروض اكون" إيييييزى" و" كووووووووول" علشان تبقى الحياة بيووووووووتيفول"...صح كدة؟؟"
0 comments:
Post a Comment