يا سلاااام طلع مشروع التخرج ده حكاية! و انا اللى فاكرة ان المشروع ده هو اللى هيكون زى البيبى بتاعى.. اتباهى بيه فى كل مكان... يا خسارة طلعت ساذجة حبتين لأنه كله مشاكل و وجع قلب... ندور على شركات انتاج و ندور على ممثلين و فى الاخر شقة مفروشة!! قلة ادب والله!!؟
اللى جذب انتباهى فى كل المواضيع دى ان الناس بتستهوى حكاية الضحك على الاخرين... كل واحد عايز يظهر انه عامل معاك واجب ما حصلش و هو ناصب عليك نصبة ما بعدها نصبة!! قال ايه احنا بنتعامل معاكم بـ " نون بروفيت "!!! قال يعنى شركة انتاج لها اسمها و صيتها مش عايزة تتربح من عملائها… و ايه بقا المصور بيكسب فى اليوم 1500 جنيه!!! يعنى فى الشهر كدة ياخد …. 45000 جنيه!!! يا سلاااااام ايه الهنا ده… اشتغل مصور بقا.. كان نفسى اقول لمدير الانتاج حرام عليك اتقى الله: لما تحب تكسب مننا اكسب بالمعقول… ده حال المصورين فى مصر ما يسرش ابدا… دى يوميته فى ماسبيرو 8 جنييييه!!! فاهم ايه الفرق ما بين 8 و 1500 جنيه؟؟
و بعدين يقول لك احنا حنصور لكم بكاميرا مش موجود منه فى مصر غير 5 و احنا اللى نملكهم… و طلع فى الاخر احقر مصورين تملكهم… و قال ايه اللى بيمسك السلوك بتاعت الكاميرا بياخد 600 جنيه فى اليوم! طب ما نمسكه احنا: ده احنا 17 واحد فى المشروع…!!؟
المهم انهم بيبصوا لنا و كأننا شلة بخلاء: لما جينا نتفاوض معاهم فى الاسعار و نقول لهم ان برة الاسعار بكذا و كذا و كذا جيه واحد يقول لنا " اتس نوت إى بيج ديل" اننا نشيل 800 جنيه من هنا و 600 جنية من هنا و 100 هنا… بجد انا مش قادرة اصدق ان فيه بجاحة زى دى
عايزين يأخذوا 30000 جنيه فى اليووووووووم الواحد، و لما نيجى نقول للمخرج قول لنا انت متخيل ممكن نعمل المشهد ده ازاى؟ يقول لنا الموضوع مش صعب يعنى، نفكر فيه فى ساعتها!! نعم يا شاطر؟؟
دى بقت ثقافتنا فى مصر: ثقافة الشطارة و الفهلوة و الضحك على الناس (او النصب بمعنى اصح).. ما بقاش فيه ذمة و ضمير.. الكسب الحلال ما بقاش شئ مهم بالنسبة لنا.. ما كل الناس عايشة كدة و مبسوطة اشمعنا احنا؟؟ هو مكتوب علينا التعب و الشقا
يلا اللى راح راح يا قلبى شكوتك لله!!؟
0 comments:
Post a Comment